بقلم : هشام الشگدالي

العرايش او العرائش من المدن المغربية الساحلية اللي كتتواجد فشمال المغرب،مدينة اللي كتمتاز بموقع استراتيجي رائع،بحر،واد،غابات….تاريخ،،،مواقع ومآثر تاريخية،،،المهم هاد التعريف البسيط عيفهموا اللي زار لمدينة وادخل اسواقها وبحر فبحورها،هي مدينة بسيطة جدا ولكن جدابة وارواحها تخليك تبغيها وتجدبك تزورها كثر من مرة،مسعفهاش الحظ تمشي بعيد بحال المدن المجاورة ولكن كيف كنقولو بالدارجة عندها حقها فالزين وحتى اذا مشا الزين يبقاو احروفو..
المهم باش نبداو اللي بغا يزور مدينتنا بغيت انقلك ان المعيشة فيها مقارنة بالمدن المعروفة كطنجة رباط…تطوان…فالمعيشة رخيصة مثلا بغيتي تاكل الحوت را بسهولة تشد طاكسي يديك للبلاصا وتجبر الحوت طري وتشريه وتاخدو للمطاعم اللي قبالتك واللي محيطة ببلاصة وتشويه او تقليه بثمن مناسب،وهاد المطاعم كذلك كيديروا شواية ساردين ومأكولات محلية مصاحبة بادنجان مرقد لاسوس لوبيا…يعني ماكولات كتصاحب الطبق ديال الحوت،نفس الشي نقولوه اذا هبطتي للمرسى كاين مطاعم فبابها ممكن تاخد رزقك ويعدلوه ويقدموهلك او تاخد منوم،نصيحة انك تسول وتعرف الثمن باش تمشي على قد جيبك.
تقدر كذلك تدخل وسط لمدينة را كينا سناكات كتقدم جميع انواع المأكولات وكينا مطاعم اخرى معروفة بالقرب من فبركة الطحين فميمكنش متكنش كتعرف خاي احمد ،ختي سعاد،ومطاعم مجاورة اخرى وكذلك مقهى مطعم ليكسوس وسط لمدينة وزيد زيد…
بالنسبة للبلايا فكتبعد على المدينة بكلمترات بالسيارة وكان الباطيل او الباساخير كيلعب دور كبير باش يقطعك وسط لبحر وتعيش عبور زوين للضفة الاخرى ولكن مسؤولين المدينة الله يهديهوم منعوا هاذ النشاط وبالتالي قطعوا رزق بزاف العائلات و حرموا السياح وناس لمدينة من متعة خاصة فداك القطيع للبلايا كيف كنقولو باللغة الاصلية ديال لمدينة.
المدينة كذلك عندها لمدينة لقديمة اللي معروفة بسوق الصغير والكبيبات والقصبة وزيد وزيد…مدينة قديمة مسعفاش الحظ من طرف المسؤولين كذلك تكون نموذجية بحال اصيلة ،ولكن بها دروب جميلة ورائحة الزمن القديم واسر كبيرة بقات على العهد ووفية لبيوتها وممكن تاخد صور جميلة للذكرى بها،ورا بها كذلك اوطيلات صغار بثمن جد مناسب واللي سول ميتلف.
كينا كذلك اوطيل بور ليكسوس ومن الاوطيلات المصنفة وبها مرافق راقية وما عليك غي تزور المكان او تدخل الكوكل وتعرف كولشي عليه.
كينا اسواق القرب بالمدينة تتسوق وتتسخر اذا بغيتي تخيم والاثمنة كتختلف من سوق لسوق لروف ما عليك غي تسول وتعرف تجيري ايامك بها…
كينا كذلك معلمة اثرية تاريخية كتبعد على المدينة بخمس كلمترات دازت بها ربعة ديال الحضارات تمشي تزورها وتعيش وتشوف التاريخ لقديم ومعلمة شميس كيف كنسميوها احنا اهل المدينة.
مدينة ساهلة تدور فيها والطاكسي كذلك موجود والاثمنة ديالو معروفة .
المحطة جات بمدخل المدينة بالقرب من ولاية الامن الوطني وكلما توغلتي للوسط كلما قربتي لوسط المدينة.
شوارع لمدينة معروفين وساهلين واللي بفمو ما يتلف.
ناس المدينة كرماء ومضيافين بزاف مع البراني وتحس براسك فمدينة بها الود والكرم.
البحر فيها متنوع تقدر تعوم فاكثر من 4 د الاماكن وكل بلاصة مختلفة عن الاخرى،رملة،صخر،امواج،بلوكيس،،،،بحر رائع جدا وكوسطات كيف كنقولو تستاهل تزورها.
كينا واد كذلك تاريخي معروف بواد اللوكوس وبه تنين قديم يحرص التفاحات الذهبية حسب الاسطورة القديمة..
اذا فيتلك زرتي لمدينة خلي كمنتير وشنو لبلاصة اللي عجباتك بزاف.