خُوذ من الكلب لَوْفَا – أبو يحيى

خُوذ من الكلب لَوْفَا
وعَنْدَاااااكْ تْكُونْ كَلْبْ

كُون بْنَادَمْ تْحَكَّمْ عَقلك
كِيفْ مَا خَلْقَكْ الرَّبْ ..

العشق مَا يْتْعَاش فْ لَخْفَى
عنداك فالحب تَكْذَبْ ..

يا صاحبي مَنْ عَنْدْ الكَلْبْ
غْرَفْ غَرْفَه ⁦

⁩
ماتكونش مَسْعُور
بطِيبَةْ الناسْ تَلْعَبْ

راه الكَلب
عَنْدُو شَلَّى صِدق
وشلَّا وْفَا
وعَنْدُو عظَّه مَا تَبْرَا 
تَدْمِي العِينْ وَالقَلْبْ ..

رَدْ بَالَكْ
إِِيَّاك تْكُون مَسْعُور
نهار تَسْعَار يْضِيع الحب . 
وتْخَلِّي الحبيب نَدْمَانْ
يبكي زَهْرُو ويَنْذَبْ ..

تَقْلَبْ عليه القُفَّه
وتْخَلِّي قَلبُ حطَبْ..

خُوذْ مَن الكَلْبْ لَوْفَا
وخْطِيكْ مَن الضَّربْ ..
خطيك من الكلام فالظْهَرْ 
وتُوبْ مَنْ الذَّنْبْ ..

يا صاحبي
خذ الحَكْمَه من أهل الحكمه
وشَاور القلب ..

كون عوينة مَاهَا صافي
الناس من كْلَامَكْ تَشرب ..